لندن(نیوزڈیسک)برطانیہ نے کہا ہےکہ اگر پاکستان نے ایگزیکٹ کے جعلی ڈگری اسکینڈل کی تحقیقات میں مدد مانگی تو بھرپور تعاون کیاجائے گا ، برطانیہ پہلے ہی اپنی سرزمین پر جعلی ڈگریوں کے خلاف سخت اقدامات اٹھارہاہے۔ ایگزیکٹ کے جعلی ڈگری اسکینڈل کی دھوم پوری دنیا میں مچی ہے ، اسی لیے وزیر داخلہ نے بھی دنیا کے اہم ملکوں سے تحقیقات میں مدد لینے کا اشارہ دیا تھا ، اس اشارے پر آج برطانیہ نے بھرپور ردعمل دیا ہے اور پالیسی بیان جاری کرتےہوئے کہا ہےکہ اگر جعلی ڈگری اسکینڈل کی تحقیقات میں پاکستان نے مدد مانگی تو اس کی بھر پور مدد کی جائے گی ، اس سلسلے میں سائبر کرائم ، محکمہ داخلہ اور تعلیمی ڈگریوں کی تصدیق کرنے والی اتھارٹیز نے اپنی حکومت کو مکمل تعاون کا یقین دلادیا ہے ، تاہم اس سب کا دارومدار پاکستان کی طرف سے مدد کی درخواست آنے پر ہے۔ برطانوی حکومت نے کہاہے کہ وہ پہلے ہی جعلی ڈگریوں کے خلاف سخت اقدامات کررہی ہے اور صرف ڈگری دینے کے نام پر برطانیہ میں کھولے گئے نوے فیصد کالجز بند کیے جاچکے ہیں ، برطانوی محکمہ داخلہ کے مطابق دو ہزار دس سے اب تک 850سے زائد فراڈ کمپنیز کو بند کیا جاچکا ہے