اسلام آباد (این این آئی) پاکستان نے پاک انڈیا تعلقات کے ضمن میں جذبہ ء خیر سگالی کے تحت انتہائی اہم اقدام اٹھاتے ہوئے سکھ یاتریوں کیلئے کرتارپور سرحد کھولنے کی تقریب میں بھارتی وزیر خارجہ ششما سوراج وزیر اعلیٰ بھارتی پنجاب کیپٹن امریندر سنگھ اور سابق بھارتی کرکٹر نوجوت سدھو کو مدعو کرلیا ہے اور اس سلسلے میں وزیر خارجہ شاہ محمود قریشی کی جانب سے دعوت نامے ارسال کر دئیے گئے ۔ ہفتہ کو وزیر خارجہ مخدوم شاہ محمود قریشی نے ہندوستانی وزیر خارجہ ششما سوراج، وزیر اعلیٰ
بھارتی پنجاب کیپٹن امریندر سنگھ اور سابق بھارتی کرکٹر نوجوت سدھو کو اس افتتاحی تقریب میں شرکت کی باضابطہ دعوت دی ۔وزیر خارجہ مخدوم شاہ محمود قریشی کی طرف سے دعوت نامے ارسال کر دئیے گئے۔وزیر خارجہ شاہ محمود قریشی نے کہاکہ ہمارا مثبت طرزعمل اور خلوص نیت پوری دنیا کے سامنے ہے ۔ انہوں نے کہا کہ وزیر اعظم پاکستان عمران خان نے منصب سنبھالنے کے بعد اپنی اولین تقریر میں ہندوستان کو مل بیٹھنے کی دعوت دی تھی ہم آج بھی اسی پالیسی پر عمل پیرا ہیں ۔
