کراچی(این این آئی) کراچی میں چینی قونصل خانے پر دہشت گرد حملے میں شہید پولیس اہلکار عامر خان کا بھائی اور بھتیجا بھی پولیس میں تھے اور وہ چوہدری اسلم کے گھر پر ہونے والے حملے میں شہید ہوئے تھے۔چینی قونصل خانے پر حملے میں شہید ہونے والے پولیس کانسٹیبل عامر خان کا گھرانا شہیدوں کا ہے، اس گھر کے افراد نے صحیح معنوں میں پولیس کی وردی کی لاج رکھی اور اپنے فرائض کی انجام دہی میں جانوں کا نذرانہ پیش کیا ہے۔کانسٹیبل عامر خان کا بھائی اور بھتیجا چوہدری اسلم کے گھر پر حملے میں ایک ساتھ شہید ہوئے تھے۔

میڈیا سے بات کرتے ہوئے شہید عامر خان کے بھائی عجب خان کا کہنا تھا کہ چینی قونصلیٹ پر حملے کے بعد عامر کے دوست کا فون آیا تھا جس نے بتایا کہ چینی قونصل خانے پر حملہ ہوا ہے اور عامر کا فون نہیں لگ رہا۔شہید عامر کے بھائی نے بتایا کہ ہم نے بھی عامر کے نمبر پر کالز کیں لیکن رابطہ نہیں ہوا جس کے بعد ہم نے دوسرے بھائی کو جناح اسپتال بھیجا جہاں سے معلوم ہوا کہ عامر شہید ہوگیا ہے۔عامر خان شہید کا 2 ماہ کا بیٹا ہے ، جبکہ چوہدری اسلم کے ساتھ شہید ہونے والے بھائی کا دوسرا بیٹا بھی پولیس میں نوکری کرتا ہے۔