کراچی (این این آئی) کراچی میں جمعہ کی صبح چین کے قونصل خانے پر حملہ کرنے اور اس دوران سیکیورٹی فورسز کی جوابی فائرنگ کا نشانہ بن کر ہلاک ہونے والے دہشت گردوں کے قبضے سے برآمد ہونے والے اسلحے، بارود اور دیگر سامان کے متعلق کراچی پولیس نے تفصیلات بتا دی ہیں۔پولیس کی جانب سے میڈیا کو فراہم کی گئی تفصیلات کے مطابق ہلاک ہونے والے دہشت گردوں کے قبضے سے 9 دستی بم برآمد ہوئے ہیں۔

پولیس نے مزید بتایا کہ دہشت گردوں کے قبضے سے خود کش جیکٹس، کلاشنکوف، اس کی گولیاں، میگزینز اور دھماکا خیز مواد بھی برآمد ہوا ہے۔کراچی پولیس کا یہ بھی کہنا ہے کہ چینی قونصل خانے پر حملہ کرنے والے دہشت گردوں کے قبضے سے چنوں کی ایک تھیلی اور ادویات بھی ملی ہیں۔واضح رہے کہ آج صبح کراچی میں چینی قونصل خانے پر دہشت گروں کے حملے کے نتیجے میں 2پولیس اہلکار شہید اور سیکیورٹی گارڈ شدید زخمی ہوا ہے۔پولیس اور رینجرز کی جوابی کارروائی کے نتیجے میں 3دہشت گرد ہلاک ہوئے ہیں۔علاوہ ازیں جناح اسپتال کی ایگزیکٹو ڈائریکٹر سیمی جمالی نے کہا ہے کہ کراچی میں چینی قونصل خانے پر حملے اب تک 6 افراد اسپتال لائے گئے، جن میں سے 5 افراد اسپتال پہنچنے سے پہلے دم توڑ چکے تھے۔انہوں نے مزید بتایا کہ واقعے میں جاں بحق ہونے والے 5 افرادکی شناخت ہوگئی ہے، جن کی عمر 35 سے 60 سال کے درمیان ہے۔ڈاکٹر سیمی جمالی نے بتایا کہ ایک زخمی شخص جمن خان اسپتال میں زیرعلاج ہے،35 اور 55 سالہ دو افراد کو مردہ حالت میں اسپتال لایا گیا۔انہوں نے یہ بھی بتایا کہ 25 سال عمر کے ہلاک ہونے والے شخص کی شناخت نہیں ہو سکی ہے۔ کراچی میں جمعہ کی صبح چین کے قونصل خانے پر حملہ کرنے اور اس دوران سیکیورٹی فورسز کی جوابی فائرنگ کا نشانہ بن کر ہلاک ہونے والے دہشت گردوں کے قبضے سے برآمد ہونے والے اسلحے، بارود اور دیگر سامان کے متعلق کراچی پولیس نے تفصیلات بتا دی ہیں۔