اسلام آباد (مانیٹرنگ  ڈیسک)عامر لیاقت حسین اپنی دوسری اہلیہ کو رخصت کراکے گھر لے آئے، دعوت ولیمہ کی تقریب کی تصاویر نے دھوم مچا دی، گورنر سندھ عمران اسماعیل اور بول ٹی وی مالک شعیب شیخ سمیت سیاسی و سماجی شخصیات سمیت صحافیوں ، دوستوں اور عزیزواقارب کی شرکت۔ تفصیلات کے مطابق عامر لیاقت حسین اپنی دوسری اہلیہ کو رخصت کرا کے گھر لے آئے ہیں

اور گزشتہ روز ان کی دعوت ولیمہ کی تقریب کراچی میں منعقد ہوئی جس کی تصاویر نے دیکھنے والوں کو دنگ کر دیا ہے۔ عامر لیاقت حسین اور ان کی دوسری دلہن سیدہ طوبیٰ انور کی جوڑی کو دیکھنے والے دیکھتے ہی رہ گئے ہیں۔ عامر لیاقت حسین پہلے سے شادی شدہ اور بچوں کے باپ ہیں ، انہوں نے چند عرصہ قبل اپنے پروگرام کی ٹیم ممبر سیدہ طوبیٰ انور کیساتھ نکاح کر لیا تھا۔ عامر لیاقت کے دوسرے نکاح کی خبر اس وقت سامنے آئی تھی جب وہ الیکشن کے سلسلے میں اپنے کاغذات نامزدگی جمع کروارہے تھے جس پر اعتراض لگادیا گیا تھا کہ انہوں نے کاغذات نامزدگی میں اپنی دوسری اہلیہ کا ذکر نہیں کیا۔ اعتراض کے بعد عامر لیاقت حسین الیکشن کمیشن کو اپنے مؤقف سے مطمئن کرنے میں کامیاب ہو گئے تھے انہوں نے موقف اپنایا تھا کہ انہوں نے دوسری شادی تو کر رکھی ہے لیکن ابھی رخصتی نہیں ہوئی جس کے باعث ان کی دوسری اہلیہ ان کی زیر کفالت نہیں ہے اور اسی لیے کاغذات نامزدگی میں اس کا تذکرہ نہیں کیا۔گزشتہ روز (جمعہ کو) عامر لیاقت حسین اپنی نئی دلہنیا سیدہ طوبیٰ انور کو بیاہ کر گھر لے آئے۔ نکاح تو پہلے ہی ہوچکا تھا اس لیے دعوت ولیمہ میں ہی ان کی رخصتی بھی ہوگئی۔عامر لیاقت کی دوسری شادی کے ولیمے میں گورنر سندھ عمران اسماعیل اور بول ٹی وی کے مالک شعیب شیخ سمیت سیاسی و سماجی شخصیات، صحافیوں ، دوستوں اور عزیز و اقارب نے شرکت کی۔