پشاور(این این آئی) جمعیت علماء اسلا م (ف) کے سربراہ مولانا فضل الرحمان نے کہا ہے کہ جعلی مینڈیٹ قوم پر مسلط کیا گیا ہے،یہ جعلی حکومت ہے،حکومت کو وقت دینا جعلی الیکشن کو قبول کرنے کے مترادف ہے،موجودہ حکومت میں مہنگائی کے ریکارڈ ٹوٹ چکے ہیں۔پشاورمیں علماء کنونشن سے خطاب کرتے ہوئے مولانا فضل الرحمان کاکہنا تھا کہ عمران خان کو چارمقاصد کیلئے ملک کا وزیراعظم بناگیا۔

اسرائیل کو توتسلیم کروانا، قادیانیوں کو تقویت دینا، آسیہ کی رہائی اورسی پیک کو خراب کرناشامل ہیں۔چاروں کام پرآغازہوگیاہے۔انہوں نے کہا کہ ملکی ایشوز سے متعلق اصولی موقف ہے، پاکستان ایک نظریاتی ملک ہے، قیام پاکستان کے لیے اسلامی نظریہ کے تحت قربانی دی گئی ہے۔ موجودہ حکومت نے سب سے پہلے انسداد توہین رسالت کی قانون میں ترمیم کرنے کی کوشش کی مگر علماء نے ناکام بنادی۔توہین رسالت کی مرتکب خاتون کو بری کیا گیا ہے۔انہوں نے کہا کہ عالمی دباؤ کے تحت ملعون آسیہ کے کیس کا فیصلہ دیا گیا ہے، ملکی جمہوریت عالمی دباؤ میں ہے۔ پرویز مشرف دور حکومت میں اسلامی قوانین سے چھیڑ خانی کی گئی ہے۔ 22 جنوری کو یورپی یونین کا وفد پاکستان آیا تھا، یورپی یونین نے اپنے دورے میں مالی تعاون ملعون آسیہ کی رہائی سے مشروط کیا تھا۔ مغربی قوتیں ملعون آسیہ کے فیصلے پر جشن منا رہی ہے۔انہوں نے کہا کہ پی ٹی آئی کا لیڈر ایک مہرہ ہے، موجودہ حکومت کو وقت دینا جعلی الیکشن کو قبول کرنے کے مترادف ہے،ملکی نظریہ کی جنگ آج سڑکوں پر لڑ رہے ہیں، حکومت دینی مدارس کی رجسٹریشن ختم کرنے پر تلی ہے، موجودہ حکومت علماء کے خلاف ایف آئی آر درج کررہی ہے۔ جیلیں بھر جائینگی مگر کسی کے سامنے نہیں جھکے گے۔