اسلام آباد(مانیٹرنگ ڈیسک) چیف جسٹس آف پاکستان جسٹس ثاقب نثار کا ملک میں آبی ذخائر کی تعمیر کیلئے نہایت اہم اور کلیدی کردار ہے اور اس حوالے سے کوئی ایسا پاکستانی نہیں جو ان کے اقدامات کی تعریف اور ان کو خراج تحسین پیش نہ کرتا ہو۔ چیف جسٹس پر قوم کے اعتماد کا یہ عالم ہے کہ پاکستانی دل کھول کر ڈیم فنڈز میں عطیات جمع کروا رہے ہیں۔ ایسے میں ایک نہایت دلچسپ واقعہ پیش آیا ہے ۔ ارشاد نامی ایک شخص نے ڈیم فنڈ کیلئے اپنا پلاٹ عطیہ کرنے کا اعلان کردیا جس کے بعد اس کے گھر والے نہایت پریشانی کے عالم میں
اسی شخص کے خلاف درخواست لیکر چیف جسٹس آف پاکستان کے پاس پہنچ گئے۔ ارشاد کے اہل خانہ کا کہنا تھا کہ یہ پلاٹ ہماری زندگی بھر کی جمع پونجی ہے جبکہ ارشاد کی اہلیہ کا کہنا تھا کہ میرے شوہر ذہنی طور پر فٹ نہیں ، ہم اپنا پلاٹ ڈیم فنڈ میں نہیں دینا چاہتے جس پر چیف جسٹس نے شہری ارشاد کے اہلخانہ کو تسلی دیتے ہوئے کہا کہ فکر نہ کریں ڈیم فنڈزمیں کافی رقم جمع ہوچکی ہے،بہت سے اللہ والے ڈیم فنڈ میں رقم جمع کرارہے ہیں۔چیف جسٹس نے ارشاد کے اہلخانہ کو یقین دہانی کروائی کہ ان کا پلاٹ انہیں واپس کر دیا جائیگا۔
