لاہور( آئی این پی)پاکستان تحریک انصاف کی حکومت نے صوبائی دارالحکومت کو دبئی بنانے کا اعلان کر دیا ہے جس کے لیے لاہور میں بھی دبئی اور یورپی ممالک کی طرح 30 سے 40 منزلہ عمارتیں تعمیر کی جائیں گی۔سینئر صوبائی وزیر عبد العلیم خان نے ایل ڈی اے کو لاہور کے لیے نیا ماسٹر پلان اور ڈاؤن ٹاؤن بنانے کی ہدایات جاری کر دی ہیں۔سینئیر صوبائی وزیر علیم خان نے
شہر کو ڈاؤن ٹاؤن بنانے کا فیصلہ کر لیا ہی جس کے تحت ایل ڈی اے کو ماسٹر پلان ترتیب دینے کے احکامات جاری کیے گئے ہیں۔ اس حوالے سے بات کرتے ہوئے سنےئر وزیر علیم خان کا کہنا تھا کہ اب وقت آگیا ہے کہ دبئی اور دیگر یورپی ممالک کی طرح لاہور میں بھی ہائی رائز عمارتوں کی تعمیر کی اجازت دی جائے۔ علیم خان نے کہا کہ ہمیں دیکھنا ہو گا کہ آئندہ چند سالوں میں ہم لاہور شہر کو کس مقام پر دیکھنا چاہتے ہیں، شہر کا ڈاؤن ٹاؤن ایریا اور کمرشل ایریا کہاں ہوگا۔رہائشی علاقہ کون سا ہو گا ، زراعت کے لیے کون سا علاقہ مختص ہو گا، شہر میں انڈسٹریل زونز کہاں بنیں گے،رنگ روڈ کہاں آئے گی،ایکسپریس ویز کہاں سے نکلیں گی،یہ ساری چیزیں اب ہی ڈیزائن ہونی چاہئیں۔ عبد العلیم خان نے ایل ڈی اے سمیت متعلقہ محکموں کو ہدایات جاری کیں کہ وہ شہر کے بائی لاز کی تیاری کے لیے دبئی سمیت دیگر شہروں سے رہنمائی حاصل کریں اور کثیرالمنزلہ عمارات کی تعمیر کے لیے ٹھوس منصوبہ بندی کے ساتھ سامنے آئیں۔ اگر دس منزلہ عمارت بن سکتی ہے تو چالیس یا پچاس منزلہ کیوں نہیں۔ انہوں نے کہا کہ ہمیں لاہور شہر کو عالمی معیار کے مطابق لانا ہو گا۔ انہوں نے ہدایت کی کہ منصوبہ بندی میں اچھی شہرت کے حامل اداروں کے انجینئیرز کی مدد حاصل کی جائے۔
