لاہور(آئی این پی )وزیر اطلاعات پنجاب فیاض الحسن چوہان نے کہا کہ ککڑی مافیا کو زیب نہیں دیتا کہ وزیر اعظم عمران خان کی ملک دوست پالیسز اور بیرون ملک دوروں پر تنقید کرے،آل شریف کا یہ پرانا وطیرہ ہے جب تک حکومت میں رہتے ہیں قومی خزانے کو اربوں کا ٹیکہ لگاتے ہیں مگر جب احتساب کا سامنا کرناپڑ جائے تو ساتھ ہی جمہوریت کو خطرہ ہے کا راگ الاپنا شروع کر دیتے ہیں۔ انہوں نے رانا مشہود کے بیان پر ردعمل دیتے ہوئے کہا کہ حمزہ شہباز کے ساتھ مل کر رانا مشہود نے پولٹری انڈسٹری پر قبضہ کر رکھاہے، انکی ککڑی مافیا کے طور پر شہرت سے ملک کا بچہ
بچہ واقف ہے، ایسے بدنام زمانہ افراد کو ملک کے وزیر اعظم کے اوپر دشنام طرازی زیب نہیں دیتی۔ آل شریف اور ان کے کرپٹ حواری اب عوام کو مذید بے وقوف نہیں بنا سکتے۔ شفاف احتساب ہوتا دیکھ کے ان کا اس طرح بد حواس ہونا سب کوسمجھ آتا ہے۔ رانا مشہود نے حمزہ شہباز کے ساتھ مل کر دس سال تک کس طرح ملک کو لوٹا سب جانتے ہیں.انہوں نے کہا کہ ن لیگ کو شرم آنی چائیے عوام کی حمایت کی بات کرتے ہیں۔ یہ جان لیں کہ ملک کے منتخب وزیر اعظم پر اس طرح الزام تراشیوں سے اب جان نیہں چھوٹنے والی۔ بے لاگ اور بے باک احتساب کا سامنا ہر صورت کرنا پڑے گا۔
