اسلام آباد( آن لائن) وفاقی وزیر اطلاعات فواد چودھری نے کہاہے کہ دوتین ہفتے ٹھہرجائیں ، جب آصف زرداری کے مزید اکاؤنٹس کا انکشاف ہوگا تو بلاول بھٹو زرداری کوحکومت پر تنقید کرنے کا مزید موقع ملے گا ، پیپلزپارٹی والے چاہتے ہیں کہ ایف آئی اے سپریم کورٹ کی بجائے ان کے ساتھ کھڑی ہو۔
نجی ٹی وی سے گفتگو کرتے ہوئے فواد چودھری نے کہا کہ پیپلزپارٹی چاہتی ہے کہ احتساب نہ ہواور آصف زرداری کے اکاؤنٹس نہ کھولے جائیں، آصف زرداری اور نواز شریف کا ایک ہی مسئلہ ہے کہ ان کے اکاؤنٹس کو نہ چھیڑا جائے ، اگر آپ ان کو نہیں چھیڑتے تو حکومت بھی ٹھیک ہے اور جمہوریت بھی اور اگر ان کو چھیڑا جائے گا تو حکومت بھی نا اہل ہے اور جمہوریت بھی خطرے میں پڑ جائے گی دوتین ہفتے ٹھہر جائیں جب آصف زرداری کے مزید اکاؤنٹس کا انکشاف ہوگا تو بلاول کو حکومت پر تنقید کرنے کا مزید موقع ملے گا۔ انہوں نے کہا کہ پیپلزپارٹی چاہتی ہے کہ سپریم کورٹ جو تحقیقات کررہی ہے وہ روکی جائیں اور ایف آئی اے سپریم کورٹ کی بجائے پیپلز پارٹی کے ساتھ کھڑی ہو، ہم سمجھتے ہیں کہ غداریوں کے مقدمے نہیں ہونے چاہئیں ، پبلک اکاوئنٹس کمیٹی کا سربراہ شہباز شریف کے بننے کی صورت میں ہمیں بہت سے تحفظات ہیں، حکومت کے پراجیکٹس کا اگر اپوزیشن آڈٹ کرے تو انصاف کی بات ہے لیکن اب اگر نوازشریف کے پراجیکٹس کا آڈٹ شہبازشریف کریں گے تو یہ انصاف کے تقاضوں کے خلاف ہو گا ۔ اس پر بات ہورہی ہے ، ایک طریقہ کار ہونا چاہئے جس پر انصاف کے کم از کم تقاضے پورے ہوسکیں، ہر واقعے کی تحقیقات ہونی چاہئے۔
