اسلام آباد(مانیٹرنگ ڈیسک)سابق وزیراعظم نواز شریف کی اہلیہ بیگم کلثوم نواز انتقال کر گئی ہیں اور شہباز شریف اور حسین نواز نے بیگم کلثوم نواز کی موت کی تصدیق کر دی ہے۔ شہباز شریف کا کہنا تھا کہ بیگم کلثوم نواز کے جسد خاکی کو پاکستان لانے کے بارے میں سوچ رہے ہیں۔ واضح رہے کہ بیگم کلثوم نواز کئی ماہ سے کینسر کے عارضے میں مبتلا تھیں اور لندن کے ہارلے اسٹریٹ کلینک میں زیر علاج تھیں۔ گزشتہ رات حالت خراب ہونے پر انہیں وینٹی لیٹر پر منتقل کر دیا گیا تھا جبکہ گردوں کےڈائیلائسز بھی کئے جا رہے تھے۔
ذرائع کے مطابق جیل میں قید نواز شریف ، مریم نواز اور کیپٹن صفدر کو بیگم کلثوم نواز کی موت کی تاحال اطلاع نہیں دی جا سکی جبکہ اس حوالے سے حکومتی سطح پر بھی تاحال کوئی ردعمل سامنے نہیں آیا۔ذرائع کے مطابق حکومتی سطح پر نواز شریف اور مریم نواز کو بیگم کلثوم نواز کی موت کی اطلاع دینے کیلئے لائحہ عمل طے کرنے کے حوالے سے شریف خاندان سے رابطہ کا بھی فیصلہ کیا گیا ہے اور شہباز شریف یا خاندان کا کوئی فرد دونوں کو بیگم کلثوم نواز کی وفات کی خبر دینے کیلئے اڈیالہ جیل جائے گا۔
