اسلام آباد(مانیٹرنگ ڈیسک)کوئی بھی قوم قربانی کے جذبے کے بغیر ترقی نہیں کر سکتی، سنت ابراہیمیؑ کا تقاضہ ہے کہ ہم زندگی کے ہر شعبے میں ایثار و قربانی کا مظاہرہ کریں، وزیراعظم عمران خان کا عیدالاضحی کے موقع پر قوم کے نام پیغام۔ تفصیلات کے مطابق وزیراعظم عمران خان نے عیدالاضحی کے موقع پر قوم کے نام پیغام میں کہا ہے کہ کوئی قوم قربانی کے جذبے کے بغیر ترقی نہیں کر سکتی۔ قربانی کا مقصد خود کو رب کریم کے حکم کے تابع
کرنا ہے، اس کا مقصد اپنی خواہشات و مفادات کو اعلیٰ مقاصد کے لئے قربان کرنا ہے۔وزیراعظم نے کہا کہ سنت ابراہیمیؑ کا تقاضہ ہے کہ ہم زندگی کے ہر شعبے میں ایثار و قربانی کا مظاہرہ کریں، ہمیں ملک و قوم کی ترقی و خوشحالی اور اجتماعی فلاح و بہبود کے لئے کام کرنا چاہیے۔انہوں نے کہا کہ عید کی خوشیوں میں معاشی طور پر پیچھے رہ جانے والوں کا خاص خیال رکھنا چاہئے۔ اللہ تعالیٰ سے دعا ہے کہ وہ ہماری عبادات اور قربانیاں قبول فرمائے۔
