اسلام آباد (مانیٹرنگ ڈیسک)پاکستان کی  15 ویں قومی اسمبلی کا پہلا اجلاس شروع ہو گیا ہے ۔ اجلاس کئی نئی چہروں کی آمد ہوئی ہے ۔ جن میں بلاول بھٹو زرداری بھی شامل ہیں۔ چیئرمین پیپلز پارٹی جب ایوان میں آئے تو عمران خان خود ان سے ملنے کیلئے گئے ۔نجی ٹی وی کے مطابق قومی اسمبلی اجلاس کے دوران عمران خان مرکزی قائدین میں سب سے پہلے قومی اسمبلی پہنچے اور حکومتی بینچوں پر سب سے آگے کی لائن میں بیٹھے۔

اس دوران نو منتخب ارکان عمران خان کی نشست پر آکر ان سے ملتے رہے اور ان کے ساتھ تصاویر بنواتے رہے۔ حکومتی و اپوزیشن ارکان کے ساتھ ملاقاتوں کا سلسلہ جاری تھا کہ اسی دوران بلاول بھٹو زرداری بھی ایوان میں پہنچ گئے۔جب بلاول بھٹو ایوان میں آئے تو عمران خان ان سے ملاقات کیلئے اپنی نشست سے اٹھ کر گئے۔ دونوں نے مصافحہ کیا اور تصاویر بنوائیں جس کے بعد دونوں اپنی اپنی نشستوں پر چلے گئے۔واضح رہے کہ آصف زرداری بھی ایوان میں موجود ہیں۔