اسلام آباد(مانیٹرنگ ڈیسک)بلاول بھٹو کی زیر صدارت پیپلزپارٹی کی سندھ کی پارلیمانی پارٹی کا اجلاس ، مراد علی شاہ وزیراعلیٰ سندھ ، آغا سراج درانی سپیکر سندھ اسمبلی کیلئے امیدوار نامزد، ریحانہ لغاری ڈپٹی سپیکر سندھ اسمبلی کیلئے پیپلزپارٹی کی امیدوار ہونگی۔ تفصیلات کے مطابق بلاول بھٹو کی زیر صدارت پیپلزپارٹی کی سندھ کی پارلیمانی پارٹی کا اجلاس کراچی میں منعقد ہوا ہے۔ جس میں چیئرمین پیپلزپارٹی بلاول بھٹو زرداری نے وزیراعلیٰ سندھ کیلئے مراد علی شاہ،
سپیکر سندھ اسمبلی کیلئے آغاسراج درانی اور ڈپٹی سپیکر کیلئے ریحانہ لغاری کو نامزد کر دیا ہے۔ ذرائع کے مطابق مراد علی شاہ سندھ کے وزیراعلیٰ بننے کے بعدپارٹی قیادت کے مشورے سے کابینہ کے ناموں کا اعلان کرینگے۔ واضح رہے کہ گزشتہ دور حکومت میں سندھ کے اندر ڈپٹی سپیکر کی کرسی پر شہلا رضا براجمان رہی ہیں تاہم اس بار بھی پیپلزپارٹی کی جانب سے ڈپٹی سپیکر کیلئے خاتون کو ہی نامزد کیا گیا ہے مگر وہ شہلا رضا نہیں بلکہ ریحانہ لغاری ہیں۔
