اسلام آباد(مانیٹرنگ ڈیسک)پی ٹی آئی مخالف اپوزیشن جماعتوں کا الیکشن کمیشن کے باہر احتجاج شروع، جاوید ہاشمی الیکشن کمیشن پہنچ گئے، الیکشن کمیشن جانیوالے تمام راستے بند، پولیس کی اضافی نفری تعینات، راجہ ظفر الحق، مشاہد حسین ، غفور حیدر ی و دیگر اپوزیشن رہنما پارلیمنٹ ہائوس میں موجود۔ تفصیلات کے مطابق پی ٹی آئی مخالف متحدہ اپوزیشن جماعتوں کا الیکشن کمیشن کے باہر احتجاج شروع ہو چکا ہے اور بڑی تعداد میں ن لیگ اور دیگر جماعتوں کے کارکنان الیکشن کمیشن کے سامنے مظاہرہ
کر رہے ہیں جبکہ سینئر سیاستدان جاوید ہاشمی بھی احتجاج میں شرکت کیلئے الیکشن کمیشن پہنچ گئے ہیں ۔ اس موقع پر الیکشن کمیشن جانیوالے تمام راستوں کو بند کر دیا گیا ہے اور پولیس کی اضافی نفری بھی تعینات کر دی گئی ہے۔ ن لیگ کے راجہ ظفر الحق، مشاہد حسین سید، مجلس عمل کے غفور حیدری اور دیگر اپوزیشن رہنما پارلیمنٹ ہائوس میں موجود ہیں۔ واضح رہے کہ متحدہ اپوزیشن کی جماعتوں نے آج انتخابات میں مبینہ دھاندلی کے خلاف آج الیکشن کمیشن کے سامنے احتجاج کرنے کا اعلان کیا تھا۔
