دیامر(آن لائن) گلگت بلتستان کے ضلع دیامر کے علاقے چلاس میں اسکولوں پر حملوں اور انہیں جلانے کے واقعات پر 10مشتبہ افراد کو گرفتار کر لیا گیا ہے۔گلگت بلتستان حکومت کے ترجمان کا اس حوالے سے کہنا ہے کہ گرفتار مشتبہ افراد کو داریل و تانگیر کے متعلقہ تھانوں میں منتقل کردیا گیا ہے۔آئی جی گلگت بلتستان پولیس ثناء اللہ عباسی کا کہنا ہے کہ ٹارگٹڈ آپریشن میں مقامی لوگ بھرپور تعاون کر رہے ہیں۔

واضح رہے کہ گلگت بلتستان کے ضلع دیامر میں گزشتہ روز نامعلوم افراد نے 12 تعلیمی اداروں پر حملے کیے، ان میں توڑ پھوڑ کی، املاک کو آگ لگادی اور دو اسکولوں میں بارودی مواد کے دھماکے بھی کیے جس کے بعد وہ با آسانی فرار ہوگئے تھے۔اسکول جلانے کے واقعات پر چیف جسٹس آف پاکستان میاں ثاقب نثار، نگراں وزیر اعظم جسٹس (ر) ناصر الملک اور وزیر اعلیٰ گلگت بلتستان حافظ حفیظ الرحمن نے نوٹس لیتے ہوئے ملزمان کی جلد گرفتاری کی ہدایت کی تھی ۔