اسلام آباد(مانیٹرنگ ڈیسک)ن لیگ کیلئے سب سے پریشان کن خبر،کپتان کی ٹیم کے تباہ کن فاسٹ بائولر فیاض الحسن چوہان نے پی پی 17راولپنڈی 12کا میدان مار لیا، ن لیگ کے عبدالحنیف کو شکست ۔ تفصیلات کے مطابق راولپنڈی کا میدان تحریک انصاف اور عوامی مسلم لیگ نے مل کر مار لیا ہے اور ن لیگ کو راولپنڈی ڈویژن میں تاریخ کی بدترین شکست کا سامنا ہے۔ پی پی 17راولپنڈی 12سے عمران خان کی ٹیم کے تباہ کن فاسٹ بائولر فیاض الحسن چوہان نے ن لیگ کے عبدالحنیف کو شکست دیدی ہے۔ فیاض الحسن چوہان

نے 40919ووٹ جبکہ ان کے مدمقابل ن لیگ کے عبدالحنیف نے 30349ووٹ حاصل کئے ہیں ۔ واضح رہے کہ فیاض الحسن چوہان اپنے دبنگ انداز گفتگو کی وجہ سے جانے جاتے ہیں اور ان کے مقابل مقررین ان کے سامنے بھی کھڑے ہونے سے گھبراتے ہیں ۔ فیاض الحسن چوہان نے جماعت اسلامی کی ذیلی تنظیم شباب ملی سے اپنے سیاسی کیرئیر کا آغاز کیا تھا جس کے بعد جماعت اسلامی سے اختلافات کے بعد انہوں نے ق لیگ میں شمولیت اختیار کی جبکہ بعدازاں تحریک انصاف سے وابستہ ہو گئے ۔