اسلام آباد (مانیٹرنگ ڈیسک)نگران حکومت نے شریک چیئرمین آصف علی زرداری کے سوئٹزرلینڈ سے 60ملین ڈالر واپس لانے کا فیصلہ کر لیا ہے ۔ خبر کی تفصیلات کے مطابق نگران حکومت کی جانب سے سابق صدر پاکستان آصف علی زرداری کے سوئیٹزر لینڈ میں موجود 60ملین ڈالر واپس پاکستان لانے کیلئے جلد ہی سوئس حکام کو خط لکھے گی جس کا حکم سپریم کورٹ نے 5سال پہلے دیا تھا جس پر عمل پہر ا نہ ہونے کی صورت میں سابق وزیراعظم یوسف رضا گیلانی کو نااہل قرار دیا گیا تھا ۔

سابق صدر آصف علی زرداری پر الزام ہے کہ انہوں نے غریب پاکستانی قوم کا خزانہ لوٹ کر سوئٹزر لینڈ کے بینکوں میں جمع کرا رکھا ہے۔ زرداری کی ملکیت میں60ملین ڈالر کا مقدمہ کئی سال تک سوئٹزر لینڈ عدالت میں چلتا رہا اور اس کیس کی پیروی ڈاکٹر بابر اعوان کرتے رہے جو آج کل تحریک انصاف کے چیئرمین عمران خان کے قانونی مشیر کے فرائض سر انجا م دے رہے ہیں ۔ ذرائع کے مطابق نگران وزیراعظم نے وزارت قانون سے سوئس بینکوں میں پڑے 60ملین ڈالر واپس لانے کی ہدایت کی ہے جس کی روشنی میں وزیرقانون علی ظفر اور اٹارنی جنرل آف پاکستان کے مابین مشاورت جاری ہے ۔ ذرائع کے بتایا ہے کہ مشاورت کے تکمیل ہوتے ہی جلد سوئس حکومت کو خط لکھ دیا جائے گا ۔ واضح رہے کہ نگران وزیراعظم ناصر الملک نے بطور چیف جسٹس آف پاکستان سابق وزیراعظم یوسف رضا گیلانی کو اس بنیاد پر نااہل قرار دے کر گھر بھیج دیا تھا ۔ ناصر الملک اب خود نگران وزیراعظم ہیں اور آصف علی زرداری کی مبینہ ملکیتی 60ملین کو واپس لانے میں اپنا کردار ادا کر سکتے ہیں۔