اسلام آباد(مانیٹرنگ ڈیسک)ملتان کے ہوٹل میں پراسرار دھماکہ، 3افراد جاں بحق، متعدد زخمی۔ میڈیا رپورٹس کے مطابق ملتان کے ایک ہوٹل میں پراسرار دھماکے کےنتیجے میں 3افراد جاں بحق ہو گئے ہیں جبکہ متعدد زخمی ہیں۔ انتظامیہ کے مطابق دھماکہ سلینڈر پھٹنے کے باعث پیش آیا تاہم بم ڈسپوزل سکواڈ اور دیگر ادارے جائے وقوعہ پر پہنچ چکے ہیں اور واقعہ کا ہر طرح سے جائزہ لے رہے ہیں۔ نجی ٹی وی جیونیوز کی رپورٹ کے مطابق دھماکہ کی نوعیت سے متعلق

قبل از تحقیقات کچھ کہنا مشکل ہے کیونکہ ان دنوں گیس کی لوڈ شیڈنگ بھی نہیں اور نہ ہی ہوٹلوں یا گھروں میں سلنڈرز استعمال کئے جا رہے ہیں ۔ اس حوالے سے ڈپٹی کمشنر کا دعویٰ قبل از وقت ہے ۔ واقعہ کے متعلق بم ڈسپوزل سکواڈ کی رپورٹ اہمیت کی حامل ہو گی جوکہ بتائے گی کہ دھماکہ کس نوعیت کا ہے۔ دھماکے کے بعد امدادی اداروں کے اہلکار جائے وقوعہ پر پہنچ گئے اور لاشوں اور زخمیوں کو ہسپتال منتقل کر دیا گیا ہے۔جائے وقوعہ کو عام آمدورفت کیلئے بند کر دیا گیا ہے۔