اسلام آباد (مانیٹرنگ ڈیسک)ایون فیلڈ ریفرنس میں سزا یافتہ سابق وزیر اعظم میاں نوازشریف اور ان کی صاحبزادی مریم نواز اپنے شوہرکیپٹن(ر)صفدر سمیت اڈیالہ جیل میں قید ہیں ۔ جیل ذرائع کے مطابق نواز شریف نے رات بے چینی میں گزاری جس کی وجہ سے ان کی نیند پوری نہیں ہو سکی۔نواز شریف کو اڈیالہ جیل میں بی کیٹگری کے تحت تمام تر سہولیات میسر ہیں، صبح ناشتے کے بعد نواز شریف کو اڈیالہ جیل کے بارے میں مختلف معلومات بھی فراہم کی گئیں۔
جیل حکام نے نواز شریف کو روٹی پلانٹ اور کچن کا دورہ کروایا اور ان کے داماد کیپٹن (ر) صفدر سے ملاقات بھی کروائی۔ جیل ذرائع نے بتایا کہ مریم نواز نے آج علی الصبح خواتین بیرک میں دیگر خواتین اوران کے بچوں سے ملاقات کی۔ نواز شریف اور مریم نواز کو جیل میں مشقت کے لیے تاحال کوئی کام نہیں سونپا گیا۔ممکنہ طور پرمشقت کے حوالے سے آج فیصلہ کر لیا جائےگا۔واضح رہے کہ مریم نواز نے شعبہ تدریس کا انتخاب کیا ہے۔
