لاہور (نیوز ڈیسک) احتساب عدالت کی جانب سے ایون فیلڈ ریفرنس میں مسلم لیگ (ن) کی رہنما مریم نواز اور انکے شوہر کیپٹن (ر) صفدر کو سزائیں سنائے جانے کے بعد انکے انتخابی حلقوں میں متبادل امیدواروں کے نام سامنے آگئے ۔ تفصیلات کے مطابق مریم نواز شریف لاہور کے حلقہ این اے 127سے اور پنجاب اسمبلی کے حلقہ پی پی 173سے امیدوار تھیں۔ عدالتی فیصلے کے بعد سابق رکن قومی اسمبلی ملک پرویز کے بیٹے علی پرویز ملک مسلم لیگ (ن) کی حمایت سے ٹیلی ویژن کے انتخابی نشان سے الیکشن لڑیں گے۔
اسی طرح پنجاب اسمبلی کے حلقہ 173 میں مریم نواز کے کورنگ امیدوار عمران شفیع کھوکھر مسلم لیگ (ن) کی حمایت سے کرکٹ وکٹ کے انتخابی نشان پر آزاد حیثیت سے الیکشن لڑیں گے۔مریم نواز کے شوہر کیپٹن صفدر بھی مانسہرہ کے کچھ علاقوں اور ضلع طورغرپر مشتمل این اے 14 سے مسلم لیگ (ن) کے ٹکٹ پر قومی اسمبلی کے امیدوار تھے تاہم عدالتی فیصلے کے مطابق اب وہ الیکشن نہیں لڑ سکتے۔ ان کے کورنگ امیدوار محمد سجاد جنگی ٹینک کے انتخابی نشان پر آزاد حیثیت سے الیکشن لڑیں گے۔
