لندن (نیوز ڈیسک) لندن میں ایون فیلڈ اپارٹمنٹس کے باہر مسلم لیگ (ن) اور مخالفین کے درمیان ہاتھا پائی ہوئی ۔ جمعہ کو احتساب عدالت کی جانب سے نواز شریف، ان کی صاحبزادی مریم نوازاور ان کے داماد کیپٹن (ر) محمد صفدر کو سنائی جانیوالی سزا کیخلاف مسلم لیگ (ن) کے چند مخالفین نے لندن میں ایون فیلڈ اپارٹمنٹس کے باہر نواز شریف مخالف نعرے لگائے جس کے بعد مسلم لیگ (ن) کے حامی کارکن بھی وہاں پر پہنچے۔
اس دوران (ن) لیگ کے حامیوں اور مخالفین کے درمیان ہاتھا پائی ہوئی۔ واضح رہے کہ سابق وزیراعظم محمد نواز شریف، ان کی صاحبزادی مریم نواز اور سابق وزیر خزانہ اسحاق ڈار نے احتساب عدالت کا فیصلہ ایون فیلڈز اپارٹمنٹس میں سنا ۔ جمعہ کو جب احتساب عدالت کی جانب سے ایون فیلڈ ریفرنس کیس کا فیصلہ سنایا گیا اس وقت محمد نواز شریف ، مریم نواز اور اسحاق ڈار ایون فیلڈ اپارٹمنٹس میں موجود تھے۔
