اسلام آباد(مانیٹرنگ ڈیسک)جنوبی وزیرستان کے علاقے لدھا میں پاک فوج دہشتگردوں پر ٹوٹ پڑی، 6دہشتگرد ہلاک، بھاری مقدار میں گولہ بارود ، اسلحہ اور مواصلاتی آلات برآمد، آپریشن میں پاک فوج کے دو حوالدار بھی شہیدہوئے، آئی ایس پی آر۔ تفصیلات کے مطابق جنوبی وزیرستان کے علاقے لدھا میں خفیہ اطلاع پر پاک فوج کے جوانوں نے دہشتگردوں کے خفیہ ٹھکانے پر آپریشن کیا ہے جس میں 6دہشتگرد فورسز کے ساتھ مقابلے میں ہلاک کر دئیے گئے ہیں۔
آئی ایس پی آر کے مطابق پاک فوج کے جوانوں نے خفیہ اطلاع پر دہشتگردوں کے ٹھکانے پر آپریشن کیا تو اس دوران دہشتگردوں نے فورسز کے ساتھ مقابلہ شروع کر دیا ۔ دہشتگردوں کے ساتھ مقابلے میں پاک فوج کے دو حوالدار عبدالرزاق اور ممتاز حسین جام شہادت نوش کر گئے جبکہ پاک فوج نے مقابلے کے بعد 6دہشتگردوں کو جہنم واصل کر دیا ہے۔ دہشتگردوں کے ٹھکانے سے بھاری مقدار میںاسلحہ و گولہ بارود سمیت مواصلاتی آلات بھی برآمد ہوئے ہیں۔
