لاہور (آئی این پی) پاکستان تحریک انصاف کی جانب سے نگران وزیراعلیٰ پنجاب کیلئے نامزد امیدوار ناصر درانی نے معذرت کرلی ہے، انہوں نے کہا کہ ان کی صحت اجازت نہیں دیتی کہ وہ نگران وزیراعلیٰ کی ذمہ داری سنبھال سکیں۔ نجی ٹی وی کے مطابق نگران وزیراعلیٰ پنجاب کیلئے نامزد امیدوار ناصر درانی نے معذرت کرلی۔ ناصر درانی نے موقف اختیار کیا ہے کہ ان کی صحت اجازت نہیں دیتی کہ وہ بطور نگران وزیراعلیٰ ذمہ داری سنبھالیں۔ ذرائع کے مطابق قائد حزب اختلاف پنجاب اسمبلی میاں محمود الرشید
نے ناصر کھوسہ کا نام واپس لینے کے بعد آج وزیر اعلیٰ پنجاب کو پارٹی کی طرف سے کے پی کے کے سابق آئی جی پولیس ناصر خان درانی اور پنجاب یونیورسٹی کے سینئر ریٹائرڈ پروفیسر حسن عسکری کے نام بھجوائے تھے، ناصر درانی کے انکار کے بعد اب ایک اور آئینی مسئلہ پیدا ہو گیا کہ اگر پارلیمانی کمیٹی میں یہ مسئلہ جاتا ہے تو تحریک انصاف کی طرف سے پروفیسر حسن عسکری کا نام ہی جائے گا جبکہ وزیراعلیٰ پنجاب کی طرف سے دو نام پارلیمانی کمیٹی میں جائیں گے۔
