اسلام آباد (نیوز ڈیسک) امریکہ کی جانب سے ایران کے ساتھ ایٹمی معاہدہ ختم کرنے کے اقدام پر پاکستان نے اپنے ردعمل میں کہا کہ اس سے مذاکراتی عمل اور سفارتکاری پر اعتماد کمزور ہو گا۔پاکستان دفتر خارجہ نے ایران کے ساتھ ایٹمی معاہدے کی منسوخی کے معاملے پر اپنے ردعمل میں کہا کہ معاہدہ ختم کرنے سے معاملہ سلجھانے کی کوششوں کو نقصان پہنچے گا۔ امریکہ کے اس اقدام سے مذاکراتی عمل اور سفارتکاری پر اعتماد
کمزور ہو گا۔ دفتر خارجہ کی جانب سے مزید کہا گیا کہ امریکہ کی علیحدگی کے باوجود دیگر فریقین ابھی بھی معاہدے پر کاربند رہنے کے لیے رضامند ہیں۔ ایران اور عالمی قوتوں کے درمیان معاہدے کا پاکستان نے خیر مقدم کیا تھا، امید ہے تمام فریقین معاہدے پر عملدرآمد کے لیے کوئی راہ نکالیں گے۔ ترجمان دفتر خارجہ نے کہا کہ آئی اے ای اے نے بھی ایران کی طرف سے معاہدے پر عملدرآمد پر اطمینان کا اظہار کیا ہے۔
