لاہور(سی پی پی) بریگیڈیئر (ر)مظفر رانجھا نے چیئرمین پی ٹی آئی عمران خان کی جانب سے الیکشن میں (ن)لیگ کو فوجی معاونت کا الزام مسترد کردیا۔چیئرمین تحریک انصاف عمران خان نے الزام عائد کیا تھاکہ 2013 کے عام انتخابات میں مسلم لیگ (ن)کو فوج کی مدد حاصل تھی۔عمران خان نے پنجاب کے اینٹی کرپشن اسٹیبلشمنٹ کے موجودہ سربراہ اور ملٹری انٹیلی جنس پنجاب کے سابق سربراہ بریگیڈیئر (ر)مظفر رانجھا پر الزام لگایا تھا

کہ انہوں نے 2013 کے انتخابات میں پاکستان مسلم لیگ (ن)کی فتح کو یقینی بنایا۔نجی ٹی وی سے گفتگو کرتے ہوئے ڈائریکٹر جنرل اینٹی کرپشن پنجاب بریگیڈیئر (ر)مظفر رانجھا نے 2013 کے انتخابات میں عمران خان کی جانب سے (ن)لیگ کو فوج کی معاونت کیالزام کی سختی سے تردید کی۔مظفر رانجھا نے عمران خان کے بیان پر ردِ عمل دیتے ہوئے حیرت کا اظہار کیا اور کہاکہ عمران خان غیر ذمہ دار شخص ہیں جو فوج پر انتخابات میں اثرانداز ہونے کا الزام لگا رہے ہیں، فوج بحیثیت ایک ادارہ کام کرتا ہے، ایک بریگیڈیئر اپنے لیے کچھ نہیں کرسکتا۔انہوں نے کہا کہ 2013 کے انتخابات میں فوج کا کوئی کردار نہیں تھا، اس وقت کے آرمی چیف جنرل کیانی نے سختی سے منع کیا تھا کہ سیاسی معاملات میں کوئی مداخلت نہیں کرنا ہے۔مظفر رانجھا کا کہنا تھا کہ اس وقت ہم دہشت گردی کے خلاف جنگ لڑرہے تھے جس میں کامیابیاں مل رہی تھیں۔بریگیڈیئر (ر)مظفر رانجھا نے عمران خان کے الزام پر خصوصی جوڈیشل کمیشن بنانے کا مطالبہ کرتے ہوئے کہا کہ عمران خان بیان حلفی جمع کرائیں میں بھی بیان حلفی دوں گا، جو بھی غلط نکلے اسے سخت سزا دی جائے۔