اسلام آباد (نیوز ڈیسک) مسلم لیگ (ن) کے سینئر رہنما چوہدری نثار علی خان کے بیانات کے بعد سابق وزیراعظم میاں محمد نواز شریف کی صاحبزادی مریم نواز نے ان کے دونوں حلقوں میں مخالفین کو ن لیگ میں شامل کرنے کے لیے کوششوں کا آغاز کر دیا ہے، چوہدری نثار کو ہرا کر رکن قومی اسمبلی منتخب ہونے والے تحریک انصاف کے رہنما غلام سرور خان کو بھی مریم نواز نے ن لیگ میں شمولیت کی دعوت دے دی ہے، ذرائع کا کہنا ہے کہ مریم نواز
غلام سرور خان سے دو مرتبہ رابطہ کرکے انہیں پارٹی میں شمولیت کی دعوت دے چکی ہیں لیکن ابھی تک غلام سرور خان نے کوئی فیصلہ نہیں کیا ہے۔ دوسری طرف غلام سرور کے قریبی ذرائع کا کہنا ہے کہ وہ کسی صورت بھی ن لیگ میں شامل نہیں ہوں گے، مریم نواز کی طرف سے چوہدری نثار علی خان کے دوسرے حلقے سے بشارت راجہ کو ن لیگ میں شمولیت کی دعوت دی گئی ہے ابھی تک بشارت راجہ نے بھی کوئی فیصلہ نہیں کیا ہے۔
