اسلام آباد(مانیٹرنگ ڈیسک)وزیراعظم پاکستان کے قومی سلامتی مشیر ناصر جنجوعہ نے دہشتگردی کے خلاف پاکستان کی فتح کا اعلان کرتے ہوئے کہا ہے کہ بلوچستان میں ہتھیار اٹھا کر پہاڑوں پر چلے جانے والے ناراض بلوچوں نے ہتھیار ڈال دئیے ہیں ۔ ناصر جنجوعہ کا کہنا تھا کہ دہشتگردی کو شکست دینے کیلئے نیشنل ایکشن پلان ترتیب دیا گیا تھا جس پر صوبوں کے تعاون سے کامیابی حاصل کی۔ انہوں نے کہا کہ آج پاکستان کے چپے چپے پر حکومتی
رٹ بحال ہو چکی ہے اور بلوچستان اور فاٹا میں ایک بار پھر پاکستانی پرچم اپنی پوری آب و تاب کے ساتھ لہرا رہا ہے۔ ناصر جنجوعہ نے دہشتگردی کے خلاف پاک فوج اور عوام کی بے مثال قربانیوں کو خراج تحسین پیش کرتے ہوئے کہا کہ پاک فوج نے عوامی حمایت اور جذبے کے ساتھ دہشتگردی کے خلاف نہ صرف جنگ شروع کی بلکہ اس جنگ میں فتح حاصل کر کے دنیا کو ورطہ حیرت میں ڈال دیا ہے ، دنیا ہمارے تجربات سے سیکھنا چاہ رہی ہے۔
