اسلام آباد (مانیٹرنگ ڈیسک) سینئر صحافی ہارون رشید نے ڈپٹی کمشنر گوجرانوالہ کی پراسرار موت کے حوالے سے ایک نجی ٹی وی چینل کے پروگرام میں اہم خبر سامنے لے آئے، انہوں نے گفتگو کرتے ہوئے کہاکہ مجھے باوثوق ذرائع نے بتایا ہے کہ ڈپٹی کمشنر سہیل ٹیپو نے اپنے دوستوں سے کہا کہ مجھ پر دو چیزوں کا خوفناک ذہنی دباؤ ہے، ایک یہ کہ شہبازشریف نے جو جلسہ کیا ہے اس کے ایک کروڑ کے اخراجات کا مجھے بندوبست کرنے کا کہا گیا ہے، ایک سرکاری زمین ہے جسے سستے

داموں لینے کے لیے خرم دستگیر نے ایڈیشنل کمشنر سے دستخط کرا لیے ہیں اور وہ فائل میرے میز پر پڑی ہے میں ایسا نہیں کرنا چاہتا۔ سینئر صحافی ہارون رشید نے کہا کہ یہ میرے ذرائع کہہ رہے ہیں اس چیز کی تحقیقات ہونی چاہیے کہ اس نے خود کشی کی ہے یا پھر اس کے انکار کے بعد اسے مار ڈالا گیا ہے، انہوں نے کہا کہ اس کا تعین عدالتیں کیا کرتی ہیں اور اس کا تعین تحقیقات کرنے والے کیا کرتے ہیں لیکن دوستوں نے کہا ہے کہ جب موقع آئے گاتو اسکی تفصیل سامنے آ جائے گی۔