اسلام آباد(مانیٹرنگ ڈیسک)پچھلے3 سال سے ڈاکوﺅں کے ایک گروہ نے شہر قائد کراچی میں لوگوں کا جینا حرام کر رکھا تھا۔ چند دن قبل یہ حیران کن انکشاف سامنے آیا کہ یہ گروہ درجنوں افغان شہریوں پر مشتمل ہے لیکن اس سے بھی بڑھ کر حیرت ناک بات یہ ہے کہ اس کا سرغنہ افغانستان کے ایک علاقے کا ناظم ہے۔ یہ شخص خود کراچی میں موجود تھا لیکن گروہ کے کچھ ارکان کے پکڑے جانے پر واپس افغانستان فرار ہوگیا۔اس گروپ کے کارندے چمن اور کوئٹہ کے

راستے افغانستان سے پاکستان میں داخل ہوتے تھے ،یہ کراچی کے مختلف علاقوں میں قیام کرتے تھے۔ ان کے مقامی ساتھی گھروں کی ریکی کرتے تھے ۔نجی ٹی وی کا کہنا ہے کہ ایک حالیہ ڈکیتی کی سی سی ٹی وی میں افغان ڈاکوﺅں کے گروہ کے سرغنہ کو واضح طور پر دیکھا جاسکتاہے۔ واردات کی سی سی ٹی وی ویڈیو میں پہلی بار اس گروہ کے سرغنہ کو دیکھا گیا ہے جس کا نام حمید اللہ ہے اور اس کے گرفتار کئے گئے ساتھیوں نے اس کی شناخت کی ہے۔