اسلام آباد (مانیٹرنگ ڈیسک) عمر چیمہ نے عمران خان اور بشریٰ بی بی کی شادی پر کہا تھا کہ دوران عدت شادی کی گئی، عدت والی خبر کا جھوٹ روزنامہ جنگ میں 8 جنوری 2018ء کی خبر سے بے نقاب ہو گیا ہے۔ یہ خبر بشریٰ بی بی کے سابق خاوند خاور مانیکا کے حوالے سے تھی جس میں انہوں نے کہا کہ بشریٰ بی بی کو تین ماہ قبل طلاق دی اور عدت پوری ہوتے ہی عمران خان نے پیغام بھیجا،

انہوں نے اس خبر میں کہا کہ عمران خان طلاق کی وجہ نہیں، تین سال سے کچھ ایسی چیزیں چل رہی تھیں جو اس طلاق کا باعث بنیں۔ واضح رہے کہ سات جنوری کو ایک نجی ٹی وی چینل نے بشریٰ بی بی کے سابق شوہر کا ویڈیو بیان چلایا جس میں انہوں نے کہاکہ بشریٰ مانیکا سے پاک بیوی اور پاکستان تحریک انصاف کے چیئرمین عمران خان سے بھلا آدمی زندگی میں نہیں دیکھا۔ اس ویڈیو بیان میں ان کا کہنا تھا کہ عمران خان کو وہ اپنے روحانی گھر کا مرشد سمجھتے ہیں اور ان کے بارے میں ایسی باتیں سن کر انہیں نہایت دکھ ہوا۔ اس سے قبل ایک نجی ٹی وی چینل کے نمائندے سے گفتگو میں خاور مانیکا کا کہنا تھا کہ انہوں نے اپنی سابقہ اہلیہ کو طلاق دی اور بشریٰ نے کبھی ان سے خلع نہیں لیا۔ ان کا کہنا تھا کہ انہوں نے اپنی سابقہ اہلیہ کے ساتھ 30 سال خوشحال زندگی گزاری۔ خاور مانیکا نے بتایا کہ ڈھائی تین سال سے گھر میں کچھ چیزیں چل رہی تھیں جس کی وجہ سے انہوں نے اپنی سابقہ بیوی کو طلاق دی ہے۔ بشریٰ بی بی کی عمران خان سے شادی سے متعلق سوال پر خاور مانیکا نے کہا کہ انہیں طلاق دیے تقریباً تین ماہ یا اس سے زائد کا عرصہ ہو چکا ہے۔ اس دوران انہوں نے یہ بھی بتایا تھا کہ ان کی سابق اہلیہ بشریٰ اپنی والدہ کے گھر لاہور میں مقیم ہیں۔ اس موقع پر جب ان سے طلاق کی وجہ پوچھی گئی تو انہوں نے جواب دیا کہ عمران خان ان کی طلاق کی وجہ نہیں بنے بلکہ بشریٰ بی بی کی روحانیت کی ایسی کچھ چیزیں ہیں جو اس طلاق کا سبب بنیں۔ اس طرح عدت کے دوران شادی کرنے والی خبرجھوٹ ہو جاتی ہے۔