اسلام آباد (مانیٹرنگ ڈیسک) کچھ روز پہلے سابق وزیراعظم میاں محمد نواز شریف نے اسلام آباد موجود تہذیب بیکری کا دورہ کیا جس کی ویڈیو سوشل میڈیا پر شیئر کی گئی، اس ویڈیو میں میاں نواز شریف لوگوں سے گھل مل گئے اور انہوں نے تصاویر بھی بنوائیں، اب بیکری کے ایک مبینہ ملازم نے حیران کن انکشاف کیا ہے، تہذیب بیکری کے اس ملازم نے بیکری کے باہر موجود ایک شخص سے بات چیت کرتے ہوئے کہا کہ ہم نے جس طرح سوچا تھا میاں نواز شریف اس طرح نہیں آئے،
سابق وزیراعظم میاں نواز شریف کے آنے سے پندرہ بیس منٹ قبل چالیس سے پچاس گارڈ آئے اور سٹاف کو دھکے دے کر باہر نکالا کہ میاں نواز شریف آ رہے ہیں، بیکری کے مبینہ ملازم نے کہا کہ اس موقع پر ہم بہت خوش ہوئے کہ میاں نواز شریف آ رہے ہیں ہم نے منصوبہ بنایا کہ ان کے آنے پر ہم نعرے بھی لگائیں گے، جس طرح انہوں نے سپریم کورٹ کا فیصلہ آنے پر نعرہ لگایا کہ مجھے کیوں نکالا، تو ہم ایک نیا نعرہ لگائیں گے کہ مجھے تہذیب سے کیوں نکالا۔ جب اس ملازم سے سوال کیا گیا کہ سوشل میڈیا پر وائرل ہونے والی ویڈیو میں تو میاں نواز شریف گاہکوں سے گھل مل گئے اور بات چیت کرتے ہوئے نظر آئے اس کے علاوہ انہوں نے تصویریں بھی بنوائیں تو بیکری کے ملازم نے جواب دیا کہ وہ تمام افراد ان کے ساتھ گاڑیوں میں آئے تھے اور کیمرہ مین بھی ان کے ساتھ تھے، ایسا لگ رہا تھا جیسے کسی فلم کی شوٹنگ چل رہی ہے۔ جب بیکری ملازم سے سوال کیا گیا کہا جا رہا ہے کہ بیکری سٹاف نے انہیں خوش آمدید کہا تو ملازم نے کہا کہ بیکری کا سٹاف تو انہوں نے سارا باہر نکال دیا تھا اور جو چند لوگ اندر بچ گئے تھے انہیں بھی ڈرا دھمکا دیا کہ کوئی نعرے نہیں لگائے گا، بیکری ملازم نے بتایا کہ نواز شریف نے اس سارے دورے میں اپنے ساتھ آئے ہوئے لوگوں کے ساتھ ہی بات چیت کی اور وہی لوگ ٹوکریاں اٹھا کر گاہک بھی بنا دیے گئے، بیکری ملازم نے کہا کہ ہم نے تو منصوبہ بنا رکھا تھا نعرے لگانے کا لیکن انہوں نے کوئی نعرہ نہیں لگانے دیا۔ سماجی رابطے کی ویب سائٹ پر وائرل ہونے والی ویڈیوز میں جو لوگ ٹوکریاں اٹھا کر میاں نواز شریف سے باتیں کر رہے تھے وہ ان کے اپنے ہی آدمی تھے اور وہ انہی کے ساتھ آئے تھے، بیکری ملازم نے کہا کہ ہم نے باقاعدہ خود دیکھا تھا اس کے علاوہ بیکری کے باہر بھی لوگ جمع ہو گئے تھے کہ شاید یہاں کوئی فلم کی شوٹنگ ہو رہی ہے۔
