اسلام آباد( آن لائن) مسلم لیگ (ن) کے اراکین قومی اسمبلی رضا حیات ہراج اور رانا قاسم نون نے پارٹی چھوڑ کر پاکستان تحریک انصاف میں جانے کی خبروں کو بے بنیاد قرار دیتے ہوئے کہا کہ ایسی خبروں کی کوئی صداقت نہیں ہے ،دونوں رہنماؤں نے سیاسی ساکھ خراب کرنے والوں کیخلاف قانونی چارہ جوئی کا اعلان کیا ہے ۔تفصیلات کے مطابق

گزشتہ روز پی ٹی آئی میں شمولیت کے حوالے سے آنے والی خبروں کی تردید کرتے ہوئے رضا حیات ہراج کا کہنا ہے کہ انہوں نے تحریک انصاف میں شمولیت اختیار نہیں کی اور نہ ہی ایسا کوئی فیصلہ کیا ہے، مخالفین نے سیاسی ساکھ کو خراب کرنے کی ناکام کوشش کی ہے ،آئندہ الیکشن مسلم لیگ (ن) کی ٹکٹ سے ہی لڑیں گے اور مخالفین کو عبرت ناک شکست سے دور چار کریں گے ۔دوسری جانب رانا قاسم نون نے بھی نجی ٹی وی سے گفتگو میں کہا کہ وہ کل بھی مسلم لیگ (ن) کے ساتھ تھے اور آج بھی ساتھ ہیں۔انہوں نے کہا کہ مسلم لیگ (ن) کو چھوڑنے کی خبروں میں کوئی صداقت نہیں اور انہیں میاں نواز شریف کی قیادت پر بھرپور اعتماد ہے۔رانا قاسم نون کا مزید کہنا تھا کہ وہ سیاسی ساکھ خراب کرنے کی کوشش کرنے والوں کے خلاف قانونی چارہ جوئی کا حق محفوظ رکھتے ہیں۔واضح رہے کہ رانا قاسم نون این اے 153 (ملتان) سے جبکہ رضا حیات راج این اے 156 (خانیوال) سے رکن قومی اسمبلی منتخب ہوئے تھے۔