اسلام آباد(مانیٹرنگ ڈیسک)حکمران جماعت ن لیگ کی جانب سے بلوچستان میں جاری سیاسی بحران کو ختم کرنے کیلئےوزیراعظم کے مشورے پر وزیراعلیٰ بلوچستان ثنا اللہ زہری مستعفی ہو گئے ہیں ۔ تفصیلات کے مطابق وزیراعلیٰ بلوچستان ثنا اللہ زہری نے وزیراعظم شاہد خاقان عباسی سے مشاورت کے بعد بلوچستان میں جاری سیاسی بحران پر قابو پانے کیلئے قربانی دیتے ہوئے استعفیٰ گورنر بلوچستان کو پیش کر دیا جس کو قبول کر لیا گیا ہے۔ ثنا اللہ زہری کچھ دیر
قبل استعفیٰ دینے کیلئے گورنر ہائوس پہنچے تھے۔ واضح رہے کہ آج بلوچستان اسمبلی میں ثنا اللہ زہری کے خلاف عدم اعتماد کی تحریک پیش کئے جانے کا قوی امکان تھا۔ بلوچستان حکومت ہاتھ سے جاتا دیکھ کر وزیراعظم شاہد خاقان عباسی جو کہ کوئٹہ میں موجود ہیں نے وزیراعلیٰ بلوچستان ثنا اللہ زہری کو مستعفی ہونے کا مشورہ دیا تھا جس کو انہوں نے پارٹی اور صوبے کے وسیع تر مفاد میں قبول کرتے ہوئے گورنر بلوچستان کو اپنا استعفیٰ پیش کر دیا جسے گورنر بلوچستان نے قبول کر لیا ہے۔
