اسلام آباد (مانیٹرنگ ڈیسک) وزیر دفاع خرم دستگیر نے کہا کہ پاکستان امریکہ کی ہر شرارت کا جواب دینے کے لیے تیار ہے، تفصیلات کے مطابق وزیر دفاع نے میڈیا سے گفتگو کرتے ہوئے کہا کہ پاکستان کا دفاع مضبوط اور پاکستان کے تحفظ بارے کوئی خوف نہیں ہے۔ انہوں نے مزید کہا کہ پاکستان اپنے وسائل سے دہشت گردی کے خلاف جنگ جاری رکھے ہوئے ہے امریکہ جسے امداد کہہ رہا ہے

وہ دراصل امداد نہیں بلکہ سپورٹ کولیشن فنڈز ہیں، انہوں نے کہا کہ امریکہ نے پاکستان کو سپورٹ کولیشن فنڈز کی مد میں 10 ارب ڈالرز دینے ہیں، خرم دستگیر نے کہا کہ امریکہ نے زیادہ امداد پرویز مشرف کے دور میں دی تھی، انہوں نے کہا کہ ڈکٹیٹروں نے جو کچھ کیا اس کا حساب جمہوری حکومتوں کو دینا پڑ رہا ہے، ایک طرف امریکی صدر ڈونلڈ ٹرمپ پاکستان کو دھمکیاں دے رہا ہے جبکہ دوسری جانب امریکی ایڈمنسٹریشن کا وہ حصہ بھی ہے جو سفارتی آداب کے انداز میں اپنے اہداف حاصل کرنا چاہتا ہے۔ انہوں نے کہا کہ پاکستان اپنے دفاع کی پوری صلاحیت رکھتا ہے۔ انہوں نے کہا کہ پاکستان افغانستان میں امن کا خواہش مند ہے اور افغان مہاجرین کی افغانستان باعزت واپسی چاہتے ہیں۔ خرم دستگیر نے کہا کہ پاکستان امریکہ سے برابری کی بنیاد پر تعلقات چاہتا ہے، اب پاکستان امریکہ کی جنگ اپنی سرزمین پر نہیں لڑے گا۔ انہوں نے کہا کہ پاکستان کا دفاع مضبوط ہے، امریکہ کی کسی بھی غیر معمولی حرکت جس سے پاکستان کو نقصان ہو اس کا جواب دینے کے لیے پاکستان تیار ہے۔ وزیر دفاع خرم دستگیر نے اس موقع پر کہا کہ موجودہ صورت حال کا حکومت جائزہ لے رہی ہے ہم نہایت تحمل سے اپنی حکمت عملی تیار کر رہے ہیں، انہوں نے کہا کہ ہم اب یہی چاہتے ہیں کہ امریکہ کے ساتھ مل کر معاملات کو آگے بڑھایا جائے۔