سیالکوٹ (مانیٹرنگ ڈیسک) وزیر خارجہ خواجہ محمد آصف نے کہا ہے کہ امریکہ کی دوستی گھاٹے کا سودا ہے ،خورشید شاہ کو سعودی عرب کے حوالے سے اعتراضات نہیں ہونے چاہئیں، میاں برادران نے جلا وطنی کے آٹھ سال وہاں گزارے ان کے وہاں خاندانی تعلقات ہیں، 2014ء سے دھرنوں کی سیاست میں کوئی کامیابی حاصل نہیں ہوئی، پی ٹی آئی نے دعویٰ کیا تھا وہ بجلی پیدا کر کے دوسرے صوبوں کو بھی تقسیم کرینگے مگر وہ ایک میگا واٹ بجلی بھی پیدا نہیں کرسکے،

پیپلز پارٹی نے ملک کو اندھیروں میں ڈالا ،ہم نے آ کر ملک کو اندھیروں سے نکالاہے۔جمعہ کو سیالکوٹ میں میڈیا سے گفتگو کرتے ہوئے وزیر خارجہ خواجہ آصف نے کہا کہ امریکی صدر ڈونلڈ ٹرمپ نے کہا کہ امریکہ سے پارٹنر شپ میں پاکستان کا فائدہ ہے لیکن حقیقت یہ ہے کہ ہمیں اس پارٹنر شپ سے ہمیشہ گھاٹا ہی ہوا ہے۔ انہوں نے کہا کہ امریکہ کا بیان اس خطے میں اپنی تمام تر ناکامیوں کی داستان ہے، ہم جو بھی پارٹنر شپ کریں گے اپنے فائدے کیلئے کریں گے۔انہوں نے کہا کہ اپوزیشن لیڈر سید خورشید شاہ کو سعودی عرب کے حوالے سے اعتراضات نہیں ہونے چاہئیں، میاں برادران نے جلا وطنی کے آٹھ سال وہاں گزارے ہیں ،وہاں ان کے خاندانی تعلقات ہیں، انہوں نے کہا کہ روزگار کے سلسلہ میں بھی 26 لاکھ پاکستانی سعود ی عرب میں مقیم ہیں وہاں ہیں ، ایسے میں وزیراعلیٰ پنجاب کا وہاں جانا ناگوار بات نہیں ہے۔ انہوں نے کہا کہ پاکستا ن کے عوام آخری فیصلہ کرنیوالے ہیں کہ اس ملک کا حکمران کون ہوگا، انہوں نے کہا کہ 2014ء سے دھرنوں کی سیاست میں کوئی کامیابی حاصل نہیں ہوئی، جولائی میں تو الیکشن ہونے جارہے ہیں اب یہ لوگ دھرنا دے کر کیا کریں گے۔انہوں نے کہا کہ تحریک انصاف والوں نے دعوی کیا تھا کہ وہ بجلی پیدا کرکے دوسرے صوبوں کو بھی تقسیم کرینگے لیکن انہوں نے ایک میگاواٹ بجلی بھی پیدا نہیں کی۔ انہوں نے کہا کہ پیپلز پارٹی نے ملک کو اندھیروں میں ڈالا جبکہ ہم نے آ کر ملک کو اندھیروں سے نکالاہے۔