اسلام آباد (این این آئی) وفاقی کابینہ کی منظوری کے بعد حکومت نے حج پالیسی 2018ء کا اعلان کردیا جس کے تحت اس بار مجموعی طور پر ایک لاکھ 79 ہزار 210 پاکستانی شہری حج کی سعادت حاصل کرسکیں گے جبکہ وفاقی وزیر مذہبی امور سردار محمد یوسف نے کہاہے کہ سپریم کورٹ کے فیصلے کی روشنی میں کمیٹی نے حج پالیسی پر نظر ثانی کی ، سرکاری حج سکیم پر عوام کا اعتماد بحال ہوا ہے، گزشتہ تین سال سے حج کیلئے درخواستیں دینے والوں میں سے 10 ہزار درخواستوں کو دوبارہ قرعہ اندازی میں شامل کیا جائے گا۔

بدھ کو وفاقی وزیر برائے مذہبی امور اور بین مذاہب ہم آہنگی سردار محمد یوسف نے نئی حج پالیسی کا اعلان کرتے ہوئے کہا کہ 2018 میں سرکاری حج سکیم کے تحت ایک لاکھ 20 لاکھ پاکستانی حج کی سعادت حاصل کرسکیں گے جبکہ پرائیوٹ حج سکیم کیلئے 59 ہزار 210 افراد کا کوٹہ مختص کیا گیا ہے۔انہوں نے کہا کہ سرکاری حج اسکیم کے ذریعے فریضہ حج کی ادائیگی کی خواہاں افراد سے درخواستیں 15 جنوری سے 24 جنوری تک مقررہ بینکوں کے ذریعے وصول کی جائیں گی جبکہ قرعہ اندازی 26 جنوری کو منعقد ہوگی۔انہوں نے کہا کہ 80 سال سے زائد عمر کے 10 ہزار خواہشمند افراد کی بیلٹنگ الگ سے کی جائیگی اور اگر عمر رسیدہ افراد کی تعداد اس سے زیادہ ہوئی تو زائد العمر افراد کو ترجیح دی جائیگی۔انہوں نے کہا کہ ایسے افراد جو گزشتہ تین برس سے حج کیلئے درخواستیں دے رہے ہیں اور منتخب نہیں ہوسکے ان میں سے 10 ہزار درخواستوں کو دوبارہ قرعہ اندازی میں شامل کیا جائے گا۔سردار محمد یوسف نے بتایا کہ حج پیکیج 2018 کے مطابق شمالی ریجن سے جانیوالے عازمین حج کو 2 لاکھ 80 ہزار روپے اور جنوبی ریجن سے تعلق رکھنے والے عازمین کو 2 لاکھ 70 ہزار روپے جمع کرانے ہونگے جبکہ ہر فرد کو قربانی کے جانور کیلئے 13 ہزار 50 روپے اس کے علاوہ دینے ہوں گے۔انہوں نے کہا کہ سپریم کورٹ کے فیصلے کی روشنی میں کمیٹی نے حج پالیسی پر نظرثانی کی اور سرکاری حج سکیم پر عوام کا اعتماد بحال ہوا ہے۔انہوں نے کہا کہ موجودہ حکومت کو پانچویں حج پالیسی کا اعلان کرنے کا اعزاز حاصل ہوا ہے اور اگر اضافی اخراجات ہوئے تو حکومت خود برداشت کریگی۔ریڈیو پاکستان کے مطابق گزشتہ برس کے حج پیکیج میں کوئی تبدیلی نہیں کی گئی البتہ گزشتہ برس حجاز مقدس میں قیام کا دورانیہ 38 روز تھا اور ممکن ہے کہ اسے کم کرکے اب 30 دن کردیا جائے۔