لاہور(ویب ڈیسک) پاکستان تحریک انصاف کے چیئرمین عمران خان کا کہنا ہےکہ سانحہ ماڈل ٹاؤن پر طاہرالقادری جو فیصلہ کریں گے ان کے ساتھ ہوں گے۔پاکستان عوامی تحریک کے دفتر میں طاہر القادری کے ساتھ مشترکہ پریس کانفرنس کرتے ہوئے چیرمین پی ٹی آئی کا کہنا تھا کہ نہتے لوگوں پر گولیاں چلانے کی کسی جمہوری دور میں مثال نہیں ملتی، یہ عوامی تحریک کا نہیں پاکستان کی قوم کا مسئلہ ہے۔انہوں نے مزید کہا کہ ڈکٹیٹر کی گود میں
پلنے والے ہمیں جمہوریت کا درس دیتے ہیں، یہ لوگ ڈکٹیٹر سے زیادہ خطرناک ہیں، یہ سیاست دان نہیں مافیا ہیں، اگر یہ مافیا نہ ہوتا تو ایک ماہ میں انصاف مل جاتا۔چیرمین تحریک انصاف کا کہنا تھا کہ سارے ادارے ان کے کنٹرول میں ہیں، انہوں نے رپورٹ کو دبانے کی کوشش کی لیکن رپورٹ سامنے آگئی، شہبازشریف اور رانا ثنااللہ انصاف میں رکاوٹ بنے ہوئے ہیں، اب طاہرالقادری جو فیصلہ کریں گے ہم ان کے ساتھ کھڑے ہوں گے۔عمران خان نے کہا کہ ’نوازشریف مجھے لاڈلہ کہتے ہیں، لاڈلہ وہ ہے جسے جنرل ضیاء نے چوسنی دے کر پالا، ان کے لیے آئی جے آئی بنوائی اور ان کی پوری مدد کی، 90 میں مہران بینک کا پیسہ دلوایا پھر 25 سال تک لاڈلے کا کیس نہیں سنا گیا، 2013 کے الیکشن میں لاڈلے کی کس بریگیڈیئر نے مدد کی، ساری زندگی لاڈلہ ایک ہی رہا ہے، اب مسئلہ یہ ہےکہ لاڈلا پاناما میں پھنس گیا تو اسٹیبلشمنٹ اس کی مدد نہیں کررہی‘۔چیرمین تحریک انصاف نے کہا کہ یہ شریف خاندان کی سیاسی زندگی کی آخری سانس ہے، ڈراموں کا وقت ختم ہوگیا، ہم ان کی تحریک کا انتظار کررہے ہیں، لکھ کر دیتا ہوں کہ ان کی کبھی تحریک چلانے کی جرات نہیں ہوگی، چیلنج کرتا ہوں یہ لوگ جو مرضی کرلیں اب نہیں بچیں گے۔
