خیرپور(مانیٹرنگ ڈیسک) سندھ کے وزیربرائے صنعت وتجارت منظور حسین وسان نے کہا ہے کہ آنے والے چند ماہ سیاستدانوں اور حکمرانوں پربھاری ثابت ہوں گے ،ان دنوں کچھ بھی ہوسکتا ہے،کرپشن سے پاک عوامی مقبولیت رکھنے والے سیاستدان آئندہ انتخابات میں کامیاب
ہوں گے،پی ٹی آئی کے سربراہ عمران خان جلد نا اہل ہوجائیں گے اور وہ سیاست کو چھوڑ کر کرکٹ اکیڈمی قائم کرکے وہاں نوجوانوں کو کرکٹ کھیلناسکھائیں گے۔خیرپور میں میڈیا سے گفتگو کرتے ہوئے منظور حسین وسان نے کہا کہ نواز شریف اور آصف علی زرداری کے مابین جلد سیاسی ملاقات کا امکان نظر آرہا ہے اور بلاول بھٹوزرداری اور مریم نواز کے درمیان ملاقات بھی متوقع ہے،انہوں نے ایک سوال کے جواب میں کہاکہ وہ پہلے بھی کہہ چکے تھے کہ ایم کیو ایم کے چار دھڑے ہوں گے چوتھا دھڑا بھی اب ظاہر ہوگیاہے۔پیپلز پارٹی عام انتخابات میں سندھ سمیت ملک بھر سے بھاری اکثریت سے کامیابی حاصل کرے گی۔انہوں نے کہاکہ اسلام آباد میں پیپلز پارٹی کی گولڈن جوبلی منائی جارہی ہے، جس میں شریک عوامی سمندر کی لہریں سب کے سامنے ہیں،پیپلز پارٹی کے سیاسی مخالفین کی نیندیں اڑگئی ہیں ،گرینڈڈیموکریٹک الائنس چوچو کا مربہ ہے وہ ماضی کی طرح سیاسی راگ الاپ کر چپ ہوکر بیٹھ جائیں گے کیوں کی انہیں معلوم ہے کہ عوام انہیں ووٹ نہیں دیں گے وہ سیاسی دھسک مٹا رہے ہیں ۔
