اسلام آباد(آن لائن)تحریک لبیک کے دھرنے میں کلہاڑیوں اور ڈنڈوں کے ساتھ شامل ہونے والے پیر سائیں سرکار کو گیارہ ساتھیوں سمیت گرفتار کر لیا گیا۔ پولیس نے 2گاڑیاں بھی قبضہ میں لے لیں۔ تمام مظاہرین کو آئی نائن تھانے منتقل کر دیا گیا۔ تفصیلات کے مطابق وفاقی پولیس نے مذہبی جماعت کی جانب سے وفاقی دارلحکومت کے داخلی راستے پر جاری دھرنے میں تخریب کاری کی بڑی کوشش کو ناکام بنادیا ہے ، پولیس نے دھرنے میں ڈنڈے اور

کلہاڑیاں لے جانے پر11افراد کو گرفتار کر لیا ہے۔جن میں راولپنڈی کے پیر سائیں سرکار بھی شامل ہیں۔ ذرائع کا یہ کہنا ہے کہ پیر سائیں سرکار اپنی قیادت میں مظاہرین کو ساتھ لے کر مظاہرین کو مسلح کر نے کیلئے کلہاڑیاں اور ڈنڈے لے کر جا رہے تھے۔ جبکہ مظاہرین نے تھانہ آئی نائن پولیس کے سامنے اپنے موقف میں کہاکہ وہ کلہاڑیاں لکڑیاں کاٹنے کیلئے لے کر جارہے تھے۔ چونکہ رات کے اوقات میں سردی کی شدت میں اضافہ ہو جاتا ہے جس سے بچنے کیلئے مظاہرین آگ جلاتے ہیں۔واضح رہے کہ فیض آباد کے مقام پر ہونے والا مذہبی جماعتوں کا دھرنا انیسویں روز میں داخل ہو چکا ہے ،دھرنا مظاہرین اپنے مطالبات پر ڈٹے ہوئے ہیں جبکہ حکومت ان کے مطالبات ماننے سے انکاری ہے۔ مظاہرین نے بھی ممکنہ آپریشن سے نمٹنے کے لیے اپنے پاس ڈنڈے اور پتھر جمع کر رکھے ہیں۔جہاں دھرنے کی حدودمیں داخل ہونے کی کوشش کرنے والی گاڑی کی تلاشی پر اسلام آباد پولیس نے کلہاڑیوں اورڈنڈوں سے بھری گاڑی پکڑ لی ،11افراد کو گرفتار کر لیا گیا۔گرفتار افراد کو مزید تفتیش کے لیے اسلام آباد کے تھانہ آئی نائن منتقل کر دیا گیا ہے۔جبکہ کلہاڑیوں اور گاڑی کو پولیس نے اپنے قبضے میں لے لیا۔