اسلام آباد(مانیٹرنگ ڈیسک) پشاور میں خودکش حملے میں ایڈیشنل آئی جی ہیڈ کوارٹر محمداشرف نور شہید، 6اہلکار زخمی۔ تفصیلات کے مطابق پشاور کے علاقے حیات آباد میں آج صبح ایڈیشنل آئی جی ہیڈ کوارٹر اشرف نورخوفناک خود کش حملے میں جاں بحق ہو گئے ہیں۔ ایڈیشنل آئی جی ہیڈ کوارٹر اشرف نور گھر سے دفتر جارہے تھے کہ راستے میں زرغونی مسجد کے سامنے ان کی گاڑی پر خودکش حملہ کیا گیا۔ انتظامیہ نے حملے کو خودکش حملہ قرار دیا ہے جبکہ خودکش حملہ آور

کے اعضا بھی جائے وقوعہ سے حاصل کر لئے گئے ہیں۔ سی سی پی او پشاور طاہر خان نے میڈیا سے گفتگو کرتے ہوئے اسے خودکش حملہ قراردیا۔ انہوں نے کہا کہ خودکش حملہ آور موٹر سائیکل پر سوار تھا۔دھماکے کی اطلاعات ملتے ہی امدادی اہلکار اور پولیس کی بھاری نفری جائے وقوعہ پر پہنچ گئی۔ زخمیوں کو حیات آباد میڈیکل کمپلیکس منتقل کر دیا گیا ہے جبکہ پولیس نے علاقے کو گھیرے میں لے کر سرچ آپریشن شروع کر دیا ہے جبکہ جائے وقوعہ سے شواہد اکٹھے کئے جا رہے ہیں۔