اسلام آباد(مانیٹرنگ ڈیسک) ایون فیلڈ ریفرنس پر نیب کی جانب سے بڑا اقدام سامنے آیا ہے۔نجی ٹی وی چینل ’’نیو نیوز‘‘ کے مطابق ذرائع نے دعویٰ کیا ہے کہ وزیر خزانہ اسحاق ڈار کے وارنٹ گرفتاری کے بعد نیب نے ایک اور بڑا قدم اٹھاتے ہوئے شریف خاندان کے اثاثے منجمد کر دیئے ہیں۔

نواز شریف، ان کے صاحبزادوں حسن، حسین،صاحبزادی مریم نواز اورداماد کیپٹن (ر) صفدر کے اثاثے منجمد کر دیئے گئے ہیں۔ نواز شریف، حسن اور حسین نواز کے بینک اکاؤنٹس بھی منجمد کر دیئے گئے ہیں۔رپورٹ کے مطابق نیب نے تمام بینکوں، ڈویلپمنٹ اتھارٹیز اور کمشنرز کو خط ارسال کر دیا ہے۔نجی ٹی وی چینل نےذرائع کے حوالے سے یہ دعویٰ بھی کیا ہے کہ ملزموں کے اکاؤنٹس سے رقوم کی منتقلی روکنے کے لئے بینکوں کو خط لکھ دیئے گئے ہیں۔ ملزموں کے نام جائیداد کی منتقلی روکنے کیلئے ڈپٹی کمشنرز کو بھی خط لکھ دیئے گئے ہیں۔ملزموں کے نام گاڑیوں کی ٹرانسفر روکنے کیلئے محکمہ ایکسائز کو خط ارسال کر دیئے گئے ہیں اور ان کے اثاثے ٹرانسفر کرنے والے کو 3 سال قید ہو سکتی ہے۔ خط میں کہا گیا ہے کہ تمام ادارے ملزموں کے نام اثاثوں کی ٹرانسفر فوری روک دیں۔