لندن(این این آئی)وزیر اعظم شاہد خاقان عباسی نے کہا ہے کہ این اے 120 کے انتخابی نتائج سے ثابت ہوگیا ہے کہ نواز شریف قیادت ہی عوام کی اصل رہنما اور ملکی ترقی کی ضامن ہے۔نجی ٹی وی سے غیر رسمی گفتگو کرتے ہوئے انہوں نے کہا کہ ایل این جی کیس میں

وہ حاضر ہیں اور عدالت میں سب کچھ سامنے آ جائے گا۔شاہد خاقان عباسی نے کہا کہ پاکستان نے امریکہ کے سامنے اپنی قومی پالیسی واضح کر دی ہے، نیویارک میں پاکستان کا دہشت گردی کے حوالے کردار پر دنیا کو بتائیں گے۔انہوں نے وزیر خارجہ خواجہ آصف کے اپنے گھر کی صفائی سے متعلق بیان کو درست قرار دیا اور کہا کہ میں بھی اس موقف کا حامی ہوں کہ اپنے گھر کی صفائی ہونی چاہیے۔واضح رہے کہ خواجہ آصف نے مولانا مسعود اظہر، حافظ سعید اور دیگر اہم شخصیات کی جانب اشارہ کرتے ہوئے کہا تھا کہ ہمیں اپنے گھر کی صفائی بھی کرنا چاہئے تاکہ دنیا کو موثر جواب دیاجاسکے جس پر چوہدری نثار نے شدیدردعمل کا اظہار کرتے ہوئے کہا تھا کہ خواجہ آصف جیسے وزراء کے ہوتے ہوئے پاکستان کو کسی دشمن کی ضرورت نہیں، خواجہ آصف کے بیان کو بھارتی میڈیا نے خوب اچھالاتھا اور اس کو پاکستان کے خلاف استعمال کیاتھا اور دعویٰ کیاتھا کہ پاکستان کا اہم ترین وزیر ہی دہشت گردوں کی موجودگی کو تسلیم کررہاہے دنیا غلط نہیں کہہ رہی کہ پاکستان میں دہشت گردوں کی پناہ گاہیں ہیں۔