کراچی(این این آئی)پاکستان تحریک انصاف کے کارکنان نے اپنی ہی قیادت کے خلاف گو گو کے نعرے لگا دیئے۔ تفصیلات کے مطابق کراچی پریس کلب کے باہر پی ٹی آئی کارکنان نے صوبائی صدر ڈاکٹر عارف علوی اور سینئر ایگزیکٹو نائب صدر حلیم عادل شیخ کے خلاف احتجاجی مظاہرہ کیا اور شدید نعرے بازی کی۔ کارکنان نے ہاتھوں میں پلے کارڈز اور بینرز تھامے ہوئے تھے جن پر ڈاکٹر عارف علوی اور حلیم عادل شیخ کے خلاف
نعرے درج تھے۔ کارکنان نے گو عارف علوی گو اور گو حلیم عادل شیخ گو کے نعرے لگائے۔ کارکنان کا کہنا تھا کہ ڈاکٹر عارف علوی کارکنان کو نظر انداز کررہے ہیں انہیں عہدے سے ہٹایا جائے جبکہ حلیم عادل شیخ کو جو عہدہ دیا گیا ہے وہ پارٹی آئین کی خلاف ورزی ہے پارٹی آئین میں سینئر ایگزیکٹو نائب صدر کا کوئی عہدہ نہیں ہے۔ کارکنوں نے دونوں رہنماوں کو عہدوں سے ہٹائے جانے تک احتجاج جاری رکھنے کا اعلان کیا۔
