اسلام آباد(این این آئی) امریکا میں پاکستان کے سفیر اعزاز چوہدری نے کہا ہے کہ پاکستان میں دہشت گردی میں ملوث عناصر کی جڑیں افغانستان میں ہیں۔نجی ٹی وی کے مطابق امریکا میں پاکستان کے سفیر اعزاز چوہدری نے کہا کہ پاکستان نے دہشت گردوں کے تمام محفوظ ٹھکانے ختم کردیئے ہیں اور اب افغانستان کی باری ہے کہ وہ محفوظ ٹھکانوں کا خاتمہ کرے کیونکہ پاکستان میں دہشت گردی میں ملوث عناصر کی جڑیں افغانستان میں ہیں۔
اعزاز چوہدری نے کہا کہ پاکستان افغانستان کے ساتھ مل کر کام کرنے کو تیار ہے اور نئی افغان پالیسی کے بعد بہت سے نکات بحث طلب ہیں۔انہوں نے کہاکہ پاک امریکا تعلقات کو صرف افغانستان کے تناظر میں نہیں دیکھنا چاہیے کیوں کہ پاکستان نے دہشت گردی کے خلاف جنگ میں اربوں روپے کا نقصان اٹھایا۔ اعزاز چوہدری نے کہا کہ سفیروں کی کانفرنس میں ہم نے نئی امریکی پالیسی اوردیگر امور پر بات کی ہے۔
