اسلام آباد (مانیٹرنگ ڈیسک) سابق وزیراعظم میاں محمد نواز شریف ان دنوں اپنی اہلیہ کی علالت کے باعث لندن میں ہیں اور وہ عید کے بعد پاکستان واپس آ جائیں گے، سابق وزیراعظم نواز شریف عوامی رابطہ مہم کے سلسلہ میں 10 ستمبر کو ایبٹ آباد میں جلسہ عام سے خطاب کریں گے۔

اس جلسے میں عوامی طاقت کے مظاہرے کے لیے امیر مقام، مرتضیٰ جاوید عباسی اور کیپٹن (ر) صفدر کو ذمہ داری سونپی گئی ہے۔ ذرائع کا کہنا ہے کہ سابق وزیراعظم نواز شریف عیدالاضحیٰ کے بعد دوبارہ رابطہ عوام مہم ایبٹ آباد سے کریں گے، جس کے لیے منصوبہ بندی شروع کر دی گئی ہے، گزشتہ روز مسلم لیگ (ن) کے صوبائی عہدیداروں، سابق ٹکٹ ہولڈرز اور ارکان اسمبلی کا ایبٹ آباد میں اجلاس ہوا اس میں وزیر اعظم کے مشیر برائے ہوا بازی سردار مہتاب خصوصی طور پر شریک ہوئے۔ ذرائع کا یہ بھی کہنا ہے کہ سابق وزیراعظم نواز شریف ایبٹ آباد کے بعد ستمبر کے تیسرے ہفتے میں ملتان کا دورہ کریں گے۔ جہاں وہ ارکان اسمبلی، وزراء، ٹکٹ ہولڈرز اور پارٹی عہدیداروں سے ملاقات کریں گے اور اس کے علاوہ وہاں عوام سے خطاب بھی کریں گے۔ سابق وزیراعظم نواز شریف کے دورہ ملتان کے موقع پر مخدوم جاوید ہاشمی کی مسلم لیگ (ن) میں شمولیت متوقع ہے۔ سابق وزیر اعظم نواز شریف سینئر رہنماء مخدوم جاوید ہاشمی کے گھر جائیں گے اور اس کے بعد انہیں ساتھ لے کر جلسہ میں آئیں گے وہاں وہ عوام سے خطاب کریں گے۔