لاہور(مانیٹرنگ ڈیسک) پاکستان مسلم لیگ (ن) کے اہم رہنما حافظ نعمان نے حلقہ این اے 120 سے کلثوم نواز کیخلاف آزاد حیثیت میں الیکشن لڑنے کا اعلان کر دیا۔ تفصیلات کے مطابق مسلم لیگ ن کی این اے 120 سے امیدوار بیگم کلثوم نواز کے کورنگ امیدوار حافظ نعمان
نے کاغذات نامزدگی واپس لینے سے انکار کرتے ہوئے بطور آزاد امیدوار الیکشن میں حصہ لینے کا اعلان کردیا ہے ، الیکشن کمیشن کی جانب سے انہیں انتخابی نشان لیپ ٹاپ الاٹ کردیا گیا ہے۔نجی ٹی وی چینل کی رپورٹ کے مطابق آج این اے 120 کے امیدواروں کیلئے کاغذاتِ نامزدگی واپس لینے کا آخری دن ہے، امیدوار شام 4 بجے تک کاغذات واپس لے سکیں گے۔ پاکستان عوامی تحریک کے امیدوار اشتیاق چوہدری نے تحریک انصاف کی امیدوار ڈاکٹر یاسمین کے حق میں دستبرداری کا اعلان کرتے ہوئے اپنے کاغذاتِ نامزدگی واپس لے لیے ہیں جبکہ پی ٹی آئی کی کورنگ امیدوار عندلیب عباس نے بھی اپنے کاغذاتِ نامزدگی واپس لے لیے ہیں جس کے بعد ڈاکٹر یاسمین راشد کو بلے کا انتخابی نشان الاٹ کردیا گیا ہے۔ پیپلز پارٹی کے کورنگ امیدوار عزیز الرحمان چن نے کاغذاتِ نامزدگی واپس لے لیے ہیں جس کے بعد فیصل میر کو تیر کا نشان الاٹ کردیا گیا ہے۔
