لاہور ( این این آئی) لاہور ہائیکورٹ نے سابق وزیر اعظم محمد نوازشریف کا نام ایگزٹ کنٹرول لسٹ میں ڈالنے کے لئے دائر درخواست پر وفاق اور وزارت داخلہ سے جواب طلب کرلیا۔گزشتہ روز لاہور ہائیکورٹ کے مسٹر جسٹس مامون رشید نے بیرسٹر اقبال چوہدری کی درخواست پر سماعت کی۔درخواست گزار نے موقف اپنایا کہ نوازشریف نااہل قرار دیئے گئے ہیں جبکہ سپریم کورٹ کے حکم پر نیب نے نواز شریف اور بچوں کو طلب کیا،
نواز شریف اور خاندان نے نیب میں پیش میں ہونے سے انکار کر دیا۔درخواست گزار کا کہنا تھا کہ نواز شریف اور ان کا خاندان مختلف ممالک کے ویزے رکھتا ہے، خدشہ ہے کہ نیب ریفرنس پر گرفتاری سے بچنے کے لیے نوازشریف بیرون ملک چلے جائیں گے اس لیے ان کا نام ای سی ایل میں شامل کیا جائے۔عدالت نے درخواست گزار کے موقف پر وفاق، وزارت داخلہ کو نوٹس جاری کرتے ہوئے 25 اگست تک جواب طلب کرلیا۔
