اسلام آباد (مانیٹرنگ ڈیسک) نوازشریف نے اپنے دور اقتدار میں روزانہ کتنے ارب قرضہ لیا؟ تفصیلات کے مطابق مالی سال 2016-17ء کے پہلے 9 ماہ میں یومیہ 3 ارب روپے کے قرضے لیے گئے۔ قومی اسمبلی میں جمع کرائے گئے تحریری جواب کے تحت ان قرضوں میں سے اسٹیٹ بینک سے 734 ارب 62 کروڑ روپے لیے گئے اس کے علاوہ کمرشل بینکوں سے 84 ارب 50 کروڑ روپیہ قرض کی مد میں لیا گیا۔ گزشتہ چار سال میں ملک کے اندرونی قرضوں کا حجم مجموعی طور پر 215 کھرب روپے تک پہنچ چکا ہے۔ مسلم لیگ (ن) کے دور میں غیر ملکی قرضوں میں 11 ارب ڈالر

کا اضافہ ہوا جبکہ ملک پر غیر ملکی قرضوں کا حجم مارچ 2017 کے اختتام پر 62 ارب ڈالر تک پہنچ گیا ہے۔ واضح رہے کہ نوازشریف حکومت نے گزشتہ مالی سال 2016-17ء کے دوران 10 ارب ڈالر سے زائد بیرونی قرضے لیے، ن لیگ کی حکومت کی قرضے لینے کی یہ شرح ملکی تاریخ میں پہلی بار اس سطح تک پہنچی ہے۔ ان قرضوں میں سے 37 فیصد قرضے گزشتہ سال چین سے لیے گئے ہیں۔ ان قرضوں میں 2 ارب 30 کروڑ ڈالر کے کمرشل قرضے اور 1 ارب 60 کروڑ ڈالر دو طرفہ مالی معاونت کے تحت قرضے ملے۔ اس طرح ن لیگ کی حکومت نے ریکارڈ قرض لیے ہیں۔