اسلام آباد (مانیٹرنگ ڈیسک) عمران خان عائشہ گلالئی سے اِن کیمرہ معافی مانگنے کے لیے تیار ہیں، ان خیالات کا اظہار وزیر مملکت طلال احمد چوہدری نے پارلیمنٹ کے باہر میڈیا نمائندوں سے خصوصی گفتگو کرتے ہوئے کیا، انہوں نے کہا کہ مسلم لیگ (ن) کے مستقل صدر کا فیصلہ ورکنگ کونسل کرے گی، پارٹی امور چلانے کے لیے ناصر خان کو قائم مقام صدر بنایا گیا ہے، طلال چوہدری نے کہا کہ عمران خان کی طرف سے گلالئی کے الزامات کے حوالے سے ثبوت فراہم کرنے کے معاملہ پر راہ فرار اختیار کرنا الزامات کو مزید تقویت دیتا ہے۔ انہوں نے
ایک سوال کا جواب دیتے ہوئے کہا کہ عمران خان اور ان کے ساتھی گلالئی کو ڈرا دھمکا کر الزامات واپس لینے کا کہہ رہے ہیں۔ طلال چوہدری نے کہا کہ بعض حلقوں کی طرف سے یہ بات بھی سامنے آئی ہے کہ عمران خان کی طرف سے الزامات واپس لینے پر گلالئی سے ان کیمرہ معافی مانگنے کی پیشکش بھی کی گئی ہے۔ انہوں نے کہا کہ تحریک انصاف کے چیئرمین عمران خان کسی دوسری سیاسی جماعت کی قیادت کو برداشت نہیں کرتے ہیں اور عدم برداشت کے رویے ڈکٹیٹر شپ کی غمازی کرتے ہیں۔ عوام عمران خان کی اس سوچ کو مسترد کر چکے ہیں۔
